Në ditën kur Republika e Kosovës feston 11 vjetorin e shpalljes së Pavarësisë, krerët e shtetit kanë zgjedhur të vizitojnë kompleksin memorial ‘Adem Jashari’ në Prekaz.

E veç tyre edhe dhjetëra qytetarë e kanë vizituar këtë kompleks mëngjesin e së dielës.

Njëri nga vizitorët, Gani Aliu i kapluar nga emocionet ka thënë për arbresh.info se duhet ende punë që amaneti i dëshmorëve të shkoj në vend.

“Së pari lavdi ju qoftë dëshmorëve, është hera e parë që po vij, nuk ka mundur të vij më herët. Duhet ende shumë punë që amaneti i tyer të shkoj në vend”, ka thënë ai.

Edhe Vjollca Bytyqi ka thënë se duhet punuar ende që amaneti i dëshmoreve të shkoj në vend.

“Edhe disa herë të tjera kam vizituar këtë kompleks, u jemi shumë mirënjohës dëshmorëve. Mendoj që kanë bërë që amaneti t’iu shkoj në vend por duhet ende punë”, ka thënë ajo.

E Sanije Zyrapi e cila për herë të parë po viziton këtë kompleks ka thënë për arbresh.info se dëshira e dëshmorëve ende nuk është realizuar.

“Janë bërë disa gjëra por jo aq sa duhet, ende nuk është plotësuar dëshira e dëshmorëve”, ka thënë ajo.

E mëngjesin e së dielës kompleksin memorial “Adem Jashari” në Prekaz e kanë vizituar edhe presidenti i Kosovës, Hashim Thaçi, kryeministri, Ramush Haradinaj dhe zëvendëskryeministri, Behgjet Pacolli./Arbresh.info/

Lexo edhe: Thaçi e Haradinaj e Pacolli vizitojnë kompleksin ‘Adem Jashari’ në Prekaz